Wanarorya watakiwa kuwekeza Rorya.

Mkuu wa Wilaya ya Rorya Mhe. Felix Lyaniva ametoa wito kwa wanarorya wanaoishi Jijini Dar es salaam kuwekeza kwenye fursa zilizopo katika wilaya hiyo iliyopo mkoani Mara.

Ameyasema hayo leo Jijini Dar es salaam alipokuwa akiongea na waandishi wa habari kuhusu mkutano wa wanarorya wanaoishi Da es salaam utakaofanyika katika ukumbi wa Karimjee siku ya  jumapili Februari 17, 2016 kuanzia saa nane mchana.

“Wilaya yetu ya Rorya ina fursa nyingi za uwekezaji zikiwemo za biashara, ardhi yenye rutuba, gesi asilia, mifugo pamoja na misitu, lakini pamoja na kuwa na fursa za rasilimali zote hizo bado ni miongoni mwa wilaya ambazo ziko nyuma kimaendeleo hivyo tunahitaji wanarorya wachukue hatua” alisema Mhe. Lyaniva.

Mhe. Lyaniva ameongeza kuwa licha ya wilaya ya Rorya kupiga hatua na  kuwa Halmashauri haijawa na kasi ya kuridhisha  kutokana na wanarorya waishio nje ya wilaya hiyo kutoshiriki ipasavyo kwenye fursa za kiuchumi na kwenye utatuzi wa changamoto mbalimbali zinazoikabili wilaya hiyo.

Aidha, Mhe. Lyaniva ameelezea baadhi ya changamoto zinazowakumba wananchi wa Rorya zikiwemo za ugonjwa wa Ukimwi, njaa pamoja na ukosefu wa huduma bora za kijamii kama vile maji safi na salama, barabara, Hospitali, shule, vyuo vya ufundi pamoja na vituo vya kutosha vya ulinzi na usalama kwa upande wa Jeshi la Polisi.

Kabla ya mwaka 2007 Rorya ilikua sehemu ya Wilaya ya Tarime, kwa sasa Rorya imekua wilaya mojawapo kati ya wilaya nne zilizopo Mkoani Mara