Waumini wa Askofu Gwajima wachangia Damu Muhimbili.

Waumini wa Kanisa la Ufufuo na Uzima linaongozwa na Askofu Josephat Gwajima wakiwa kwenye foleni kwa ajili ya kuchangia damu ili kuokoa maisha ya wagonjwa wenye mahitaji ya damu. Shughuli hiyo imefanywa jana na Hospitali ya Taifa Muhimbili (MNH) kwa kushirikiana na Mpango wa Taifa wa Damu Salama.

Mshauri wa MN, Erica Ishengoma akiandika maelezo baada ya kumsikiliza mmoja wa waumini wa kanisa hilo, huku wengine wakiwa kwenye foleni kabla ya kutoa damu.

Ofisa Uhamasishaji wa uchangiaji damu salama, Hamisi Kubiga (kulia) na Erica Ishengoma wakiwapatia chupa maalumu za kuweka damu baada ya kupima uzito.

Wataalamu wa maabara, Peter Onesmo (kulia) na Anthony (wa pili kulia) wa Hospitali ya Taifa Muhimbili (MNH) wakiendelea kutoa damu baada ya waumini hao kujitokeza kwa wingi jana katika kanisa hilo lilipo Ubungo jijini Dar es Salaama.

Mtaalamu wa maabara Anthony wa Hospitali ya Taifa Muhimbili akiendelea na shughuli ya utoaji damu jana katika kanisa hilo.

Hawa Hamisi (18) akichangia damu jana. Hawa amesema kuwa anasikia fahari kuchangia damu ili kuokoa maisha ya wagonjwa wanaohitaji damu katika hospitali hiyo.

Mtaalamu wa maabara wa MNH, Sebastian Magulu akiandaa chupa za damu baada ya waumini wa kanisa hilo kutoa damu jana tayari kwa kuhifadhiwa na kusafirishwa hadi Hospitalia ya Taifa ya Muhimbili.

Muumini wa kanisa hilo, Vedasto Aloysi akitolewa damu jana katika kanisa hilo na mtaalamu wa maabara na Peter Onesmo.

Picha zote na John Stephen, Hospitali ya Taifa ya Muhimbili (MNH)

Na Neema Mwangomo

Dar es Salaam, Tanzania. Waumini wa Kanisa la Ufufuo na Uzima linaloongozwa na Askofu Josephat Gwajima wamejitokeza kwa wingi kuchangia damu jana ili kuokoa maisha ya wagonjwa wanaohitaji damu katika Hospitali ya Taifa ya Muhimbili (MNH).

Katika shughuli hiyo ya utoaji damu MNH kwa kushirikiana na Mpango wa Taifa wa Damu Salama, Kanda ya Mashariki wamefanikiwa kukusanya zaidi ya chupa nyingi za damu.

Akizungumzia shughuli hiyo Ofisa Uhamasishaji wa Damu salama wa MNH, Hamisi Kubiga amesema kwamba mahitaji ya damu katika hospitali hiyo ni makubwa kwani kwa siku chupa zinazotakiwa kukusanywa ni 70 hadi 100 ili kuweza kukidhi mahitaji ya wagonjwa wanaohitaji damu.

Kubiga amesema kuwa baadhi ya makundi ambayo yanauhitaji mkubwa wa damu ni kina mama wajawazito, majeruhi, na wagonjwa wa saratani hivyo amewaomba Watanzania wajitokeze kwa wingi kuchangia damu ili kuokoa maisha ya wagonjwa.

“Hivi sasa tunaendesha mpango wa uchangiaji damu, tunashukuru wapo wananchi wamejitokeza lakini bado tunawaomba wananchi, taasisi kampuni binafsi na umma waje kwa wingi ili kwa pamoja tuwasaidie wenzetu wenye uhitaji,” amesema Kubiga.

Shughuli ya utoaji damu inaendelea jumapili ijayo kwenye kanisa hilo la Ufufu na Uzima.

Endapo taasisi, kanisa, shule na makundi mengine yanataka kuchangia damu. Wawasiliane na Mkuu wa Idara ya Maabara wa Hospitali ya Taifa ya Muhimbili kwa namba 0754 575 981, Mkuu wa Idara ya Maabara namba0713 777 595 na Ofisa Uhamasishaji wa Damu salama wa hospitali hiyo namba 0754 597 165.