Je wajua neno la mwisho alilolisema Haji manara juu ya TFF.

Haji Manara-Afisa habari Simba SC

Mkuu wa kitengo cha habari wa klabu ya Simba SC, Hajji Manara ameiomba Taasisi ya Kupambana na Kuzia Rushwa nchini-TAKUKURU kuweka kambi na kufanya uchunguzi yakinifu katika Shirikisho la soka nchini, TFF ambalo limegubikwa na tuhuma za rushwa na upangaji matokeo katika michezo miwili ya mwisho katika ligi daraja la kwanza.
Jumapili iliyopita Kamati ya nidhamu ya TFF ilitoa hukumu ya tuhuma za upangaji matokeo zilizokuwa zikizikabili timu za Polisi Tabora, JKT Oljoro, Kanembwa JKT na Geita Gold Sports. Wachezaji, waamuzi, makocha wasaidizi na baadhi ya viongozi wa ngazi za chini katika klabu hizo wameadhibiwa kwa kupewa vifungo vikubwa.
Siku moja baada ya kutolewa kwa hukumu hiyo, mkurugenzi wa mashindano wa TFF akajiuzulu katika nafasi yake. Na jana ikasambaa sauti ikisikika baadhi ya viongozi wa juu wa TFF wakipanga mipango jinsi ya kupanga matokeo katika mechi ya Kanembwa v Geita kabla haijachezwa.
Dennis Richard golikipa wa klabu ya Simba aliye kwa mkopo Geita Gold amefungiwa miaka kumi kujihusisha na soka huku pia akitozwa faini ya milioni kumi.
“Mtu anayepanga matokeo Simba haimuungi mkono na inataka hatua zaidi za kinidhamu zikichukuliwa ikithibitika. Tunasema hivi kwa sababu kuna mchezaji wetu alikuwa kwa mkopo Geita (Dennis Richard ) amefungiwa miaka kumi kwa tuhuma za rushwa na upangaji wa matokeo.”
“Kupanga matokeo ni kosa kubwa sana katika mpira, na mtu akibainika afutwe si tu kufungiwa maisha. Lakini kwa tuhuma tulizozisikia jana (kuvuja kwa sauti ya vigogo wa TFF wakipanga njama za kupanga matokeo) tunaiomba TAKUKURU ikapige kambi TFF, pale kuna zaidi ya kilichoamuliwa na kamati ya nidhamu.”
“Tunaiomba TAKUKURU-Mamlaka husika katika kusimamia upigaji vita rushwa ikapige kambi pale. Uchunguzi wake uanzie juu kwani katika audio iliyosamba jana inawataja baadhi ya viongozi wa juu wa TFF. Inaonesha hili jambo kamati ya nidhamu ilikuwa mzigo mzito kwao,” anasema Manara.